2019年7月22日 星期一

作為羊國租客要注意的事


上回抵步後的住宿安排一文中有提過啱啱嚟時一啲搵屋住要注意既地方,今回就講講我哋要租一間屋時個程序係點。
經過一輪既搜尋終於搵到心儀租盤,而屋主 (landlord) 又願意租俾你既時候,就需要簽租約。喺呢度普遍嚟講租約最少都簽一年,即係香港所謂既死約,但就冇生約呢回事。不過呢個只係一般做法,法例上冇呢項規定。對租住時間相關既法例只有終止租約既通知期。如果租客想終止租約,必需 21 日前通知屋主,但如果係屋主想終止租約,就要 90 日通知。所以點解呢度啲屋主租屋俾人時會咁揀客,因為佢地都好怕租咗間屋俾唔知咩人。

租屋最怕就係加租,不過喺羊國,有關租務既法例都比較偏向保護租客。喺租住既頭 180 日內,屋主係唔可以加租。而加咗租既 180 日內,屋主亦唔可以再加。每次加租,屋主亦都要 60 日前通知。如果你覺得租金不合理地貴,你甚致可以去 report,由租務法庭頒令減租,不過舉証責任係喺租客身上。

除咗租金,呢度租屋係要俾按金 (bond) 。按金最高係四星期租金。(順帶一提,呢度租金係按星期咁計。)按金,唔係個屋主自己袋袋平安,而係交俾政府既。通常租屋時屋主都會問你收埋,屋主收咗按金之後 23 個工作天內要交俾政府,之後屋主就會俾返一張按金既收據你。呢張嘢你就要好好保管等將來退租拎返按金時用。同喺香港一樣,按金就係驚你唔交租,整爛嘢要賠果啲用途,正常人都唔會話俾人扣按金既。

喺今年羊國政府有關於租務既新法例生效,就係屋主放租出嚟既屋一定要做天花既 insulation,即係隔熱。如果地台係有空間做既亦都必需做埋。羊國政府好明白屋係要嚟住,所以保暖係好緊要。遲下法例將會再修改,屋主必需為放租既屋添置發熱既裝置,例如 heat pump 或者暖爐。不過要間屋夠暖,最緊要就係間屋有陽光,睇屋時留意下屋前窗口有冇俾其他屋或者樹遮擋,同埋呢度向北既屋先係好嘢嚟。另外,法例又規定放租既屋每一間房都必需安裝煙霧警報器 (smoke alarm) 。所以屋主要租間屋出去俾人其實都幾煩架。

最後要講既係,羊國屋漏水係一件好嚴重既事,屋主係會被 council 要求維修,住慣漏水樓既香港人要習慣吓自己既住屋權益,從新認識返屋係用嚟住呢個事實。

最後最後,嚟到呢度就要改口,唔係租樓,而係租屋。

移居羊國,你預備好未?

近期香港局勢動盪,好似觸發咗一輸恐慌性移民潮,大量仍身處香港朋友都有問我關於移民羊國既事。呢個 blog 一直以來講關於移民羊國既嘢,主要都係圍繞住技術討論,但其實講移民,最重要既係 mental 上既問題,即係你同你既家人 ready 未?