近期香港局勢動盪，好似觸發咗一輸恐慌性移民潮，大量仍身處香港朋友都有問我關於移民羊國既事。呢個 blog 一直以來講關於移民羊國既嘢，主要都係圍繞住技術討論，但其實講移民，最重要既係 mental 上既問題，即係你同你既家人 ready 未？
要由一個土生土長既地方移居到另一個地方，本身都算係一件大事。如果係講台灣或者馬來西亞等地方都還好，起碼叫文化及語言較為貼近，氣候環境等亦唔需要特別適應，有乜事要返香港都係搭幾個鐘頭飛機。但嚟到羊國，就唔係咁簡單。離開香港，一走就走到去南半球，十一個鐘頭飛機既距離，氣候變化比香港「豐富」得多。文化，語言又完全係另一個國度。呢啲都係好貼身，需要考慮，同埋唔係想像中咁容易既事嚟。
可能我地長期生活喺香港受既壓迫太大，所以往往諗到移居外國係一件非常美好既事。我哋去旅行到外地，當然會覺得外國地方大，生活舒適優閒，同香港真係天堂同地獄既分別。但旅行同生活係截然不同既事，旅行係洗錢，生活係搵錢。喺每個地方生活都有唔同既困難要面對。以我而家喺羊國為例，羊國最大問題係人工低稅率高洗費勁，所以一定要改變自己既生活模式去適應呢度既生活。喺香港你可以年年買新 iPhone，每個月最少去一次 fine dinning，今個月就 Felix 下個月就 Gaddis，但嚟到呢度就買條菜都要格價，聽 Spotify 都驚爆 data。你預備好自己去接受全新既生活模式未?
除咗自己，你既屋企人又預備好未？好多朋友決定走同唔走，主要既位都係關於屋企人。有人決定要留低照顧年老長老，有人就可能老婆唔願郁。家家有本難諗的經，人人屋企狀況都唔同，條路亦都會唔同，亦冇話邊條路一定會好過另一條路，唔通留喺香港就一定死？但香港仲有七百幾萬人喎。要做呢個咁重大既決定之前，同家人溝通好係最重要既事。移民本身已經好多嘢要煩好多嘢要搞，如果期間你仲要處理家事，只會為自己增加更多壓力，更容易做錯決定，心理上亦都好難負擔。
我決定過嚟羊國前，已經同家人及長老有共識，自己一個先嚟呢度搵工搵屋。雖然一切已經有晒計劃，但一落機隻腳踏上地面果一刻，我已經覺得有啲惘然，果一刻既感覺印象好深，拋開晒香港已有既一切，靠既只有自己同幾個朋友，喺一個陌生環境建立返自己想要既嘢。頭兩個月搵工，除咗有簽証既壓力之外，亦要面對完全不同既求職方法。就算唔講搵錢講洗錢，由搵屋租到買傢俬電器一腳踢，自己一個人砌起晒全屋既枱櫈櫃，天光砌到天黑仲要出去買餸煮飯，頭幾個月自己一個人既生活的確唔易過，靠既都係遠方家人既支持。嚟得，就要有心理準備去克服一堆問題，你同你既家人又預備好未？
