喺羊國，對車既需求唔會好似美國咁冇車就邊度都唔駛去，以我身處既奧克蘭為例，呢度都有頗多既巴士線去唔同既地區。之但係羊國既公共交通係出名地貴，加上唔夠人渣巴士，部份路線會間唔中甩咁班車，所以大部份人都係會選擇返渣車，結果又造成嚴重既塞車問題。但點都好，渣車始於係呢度最方便既出行模式。
如果你喺香港有車牌，而且有兩年牌齡或以上，咁就恭喜你又煩少樣嘢，因為你可以免試換牌。如果你有香港車牌但牌齡不足兩年，咁你就需要考 practical test 先可以有車牌。
喺羊國關於駕駛執照既申請事項都係由一間叫 AA Club 既嘢代理。換牌係唔駛預約，只要帶埋你既 passport，passport 既全彩影印本，你個車牌，同埋車牌既正背面全彩影印本去附近一間AA Club，喺 Auckland CBD 就有一間。去到 AA Club 拎張叫 DL5 既 form 填好，交埋啲文件，之後做一個好簡單既視力測試，影埋張相，俾埋錢，佢就會俾張類似收據既紙你，呢張就係你既臨時駕駛執照。正式果張會稍後郵寄去你既登記住址度。
頭先講過要有兩年牌齡先可以免試換牌，但如果你睇下你手上張車牌，你會發現而家香港車牌係冇簽發日期，咁點證明你既牌齡呢？有人試過用舊果張過期車牌，嚟佐證自己牌齡，雖然係成功，但我覺得最穩陣都係跟官方做法，即係去香港運輸處申請一張叫駕駛執照細節證明書既文件，上面有寫明你由邊年邊月考到你第一個車牌，咁就足夠證明你既牌齡。
羊國駕駛執照，除咗渣車要用之外，佢仲係你既身份證明文件，對你之後要申請其他服務，又或者上網買嘢去拎貨等都非常有用。即使你唔駛渣車住，都建議申請咗先，普遍人人都有既嘢但你冇，就會有啲不便。
