2019年9月24日 星期二

羊國考車四步曲


之前既文章有提及過點樣拎住香港既車牌嚟羊國換成羊國車牌,過程都非常簡單同埋一到步就已經做到。但如果你喺香港未考到車牌,嚟到羊國要點考牌呢?今次我就簡單咁講吓喺羊國考車牌有咩 stage,一如以往詳細 details 都係去睇官網啦。

喺羊國,由一開始到最後拎到 full licence 為目標,係要經過四個步驟,分別係 theory test,learner licence,restricted licence,最後就係 full licence。如果同香港比較,就係多咗 restricted licence 呢一步。

Theory test 顧名思義就係筆試,同香港差唔多,都係讀熟本 road code 再去答問題。以現時計以我所知係要 35 條之中答中 32 條為之合格。Pass 咗 theory test 後,你就係獲發 learner licence,即係香港既學神牌,揸住呢個學神牌你就可以喺路面上面學車喇。不過呢度就同香港有少少唔同,學車係唔一定要跟所謂師傅既,任何有兩年以上羊國 full licence 既人都可以係你師傅,只要有呢個人同你一齊,再喺車前後玻璃掛個"L"牌,咁你就可以揸住架車週圍去,但留意返,學神係唔可以喺 10pm - 5am 揸車既。

要由學神向下一步進發,你就要考路試。呢度既路試聽落去我覺得係難過喺香港,最主要原因係考試時間長,係有成六十分鐘咁多!仲有考試既其中一 part 係要上 motorway,即係高速公路,對學神嚟講我覺得要揸咁耐同埋上高速都算係一件幾危險既事。而且喺六十分鐘裡面,只容許你犯兩次錯誤,錯第三次就 GG 了。考試成功既,你就會由 learner licence 變成 restricted licence。有 restricted licence 揸車就唔再需要有個兩年 full license 既人磅住,不過同樣你就唔可以喺 10pm - 5am 呢段時間揸車,同埋除咗你屋企人之外你係唔可以戴任何其他人既,除非車上有個有兩年以上 full licence 既人。

拎住 restricted licence 最快半年後,你就可以報考 full licence。考 full licence 一樣係路試,不過時間就短啲,得三十分鐘,但係咪易咗呢,又唔係。因為考 full licence 其中既一大特色係你要講嘢。考試期間考官有可能會問你現時路面既狀況,你要答得出有乜 potential 既危險,要點做之類。過得到呢關既,你就得到 full licence,喺羊國揸車唔再有額外限制,連你揸棍波定自動波都冇限架!

喺度仲想額外講多樣嘢,香港既學神牌,係可以嚟羊國轉成羊國既學神牌,有效期係五年。所以如果你喺香港未有車牌而想考,不妨考慮先喺香港過咗筆試先,嚟到羊國轉到羊國學神牌再去考 restricted licence。羊國考牌對比喺香港考牌既好處係排期短同價錢平,就算衰咗都可以好快再考過,考試費講緊既係唔駛一百蚊羊幣。況且就算你喺香港考到新手牌,都要等兩年先可以轉成羊國既 full licence。所以如果以最快可以喺呢度揸到車嚟計,喺呢度考既時間同金錢成本應該會比香港低既。

參考資料:https://www.nzta.govt.nz/driver-licences/

移居羊國,你預備好未?

近期香港局勢動盪,好似觸發咗一輸恐慌性移民潮,大量仍身處香港朋友都有問我關於移民羊國既事。呢個 blog 一直以來講關於移民羊國既嘢,主要都係圍繞住技術討論,但其實講移民,最重要既係 mental 上既問題,即係你同你既家人 ready 未?