先講一啲數據。羊國政府公佈既 2018 統計數字，其中家庭入息中，人工收入既中位數係 NZD78,000，個人入息中位數就只有四萬幾。平均收入就分別係九萬幾同五萬幾。一般啱啱嚟到羊國既人都會選擇喺最大城巿 Auckland 落腳，所以我哋再睇睇 Auckland 既家庭收入，平均係每年十二萬幾。如果睇中位數同平均數，個差別都幾大，原因就係唔同行業喺羊國既人工都有一定距離。要知道自己果行喺羊國既人工係大概多少，可以 google "payscale" "NZ" 呢組 keywords。而道聽途說返嚟，同一行裡面，唔同公司既人工差別就唔會好大，就算職位比較高人工都唔會突然高一大截，不過呢點就暫時未能證實。
從以上數字睇，將佢哋換算返做港幣，家庭入息每年大概只有四十萬至五十萬。對於有足夠子彈可以逃離香港既人嚟講，分分鐘一個人喺香港搵得仲多。仲有唔好唔記得羊國既稅率比香港高得多。羊國入息稅同香港一樣都係累進制，但最高既一個稅階係講緊 33% ，比香港高出接近一倍。另外呢度係冇免稅額呢回事，即係你已婚又好要養成竇又好，仲有四大長老要供養都好，你都係會俾羊國政府硬掘咁多稅。公司每次出糧時，都會幫你扣埋稅，而唔係好似香港咁自己一炮過交晒一年。要知道自己份糧實際扣稅後得返幾多落袋，可以搵 google 大神，keyword 係 "after tax calculator NZ"。
上面堆數字亦可以睇到一般羊國家庭既入息結構。從個人同家庭既入息差距，我哋可以估到喺羊國一般都係講緊兩個人搵錢。所以要移居羊國，除咗個 principle applicant 要盡快搵到工而成為正式居民外，亦都要考慮 partner 可以從事啲乜嘢工作。長遠嚟講，都係要兩個人搵錢先可以追得上羊國人既收入水平。
下一回我再講吓喺羊國既洗錢概況。
資料來源: https://www.stats.govt.nz/information-releases/household-income-and-housing-cost-statistics-year-ended-june-2018
