羊國既既搵工方法同香港可以話係天淵之別。唔好以為自己果份係短缺職業而以為嚟到唔憂搵唔到工，呢度既文化係寧願請唔到人都唔會亂請人，皆因對公司嚟講，呢度請人容易炒人難，搵到個唔啱公司洗既人對佢哋嚟講係災難。所以，喺度搵工，比喺香港時反而要更積極，預備更多。
啱啱嚟到羊國安頓好的話，就即刻要為搵工預備。呢度有一個叫 Careers NZ 既政府機構，佢哋有一個叫 Work Connect 既 program 係專為技術移民而設。個 program 有包括兩日既 workshop 同埋兩節單獨訓練同 Q&A。唔好諗咁多，一定要報，反正你啱啱嚟到都大把時間。Workshop 裡面主要有簡單講下羊國文化，少量羊國人常用英語，重點係教要點搵邊度請人，點寫 CV，interview 技巧等等。
喺呢個 workshop 度，你會得到一個好重要既訊息，就係呢度請人係唔興登報紙既。羊國既 Job Market 就好似一座冰山咁，俾你睇到既只係一小部份，其餘大部份你都係見唔既。雖然呢度一樣有 Seek, TradeMe 等搵工網站，但有七成既工係完全唔會出廣告請人。Workshop 有教點樣，用乜方法搵呢堆水底下既工出嚟。歸納出嚟，其實主要都係唔好怕醜，out going 啲，去識多啲唔同既人，因為人既 referral 係呢度既搵工主要手段。
要識多啲唔同既人，可以主動啲去參與一啲 meetup 活動。呢度有一個叫 meetup 既 app，裡面有唔同人舉辦唔同類型既 meetup，例如有一齊做運動，跑步踢波，飲飲食食，師奶閒聊，而當中就唔好放過同你職業有關既 group。識多啲同行既人，對你搵工有極大幫助。
另外除咗要執靚 CV，你亦都要執靚你個 LinkedIn account。LinkedIn 係最容易搵到同你職業有關既人脈，有時甚致有 job agent 主動搵你。不過記住 job agent 只會為佢老細，即係要請人既公司負責，唔好對佢地期望太高，俾佢哋搞完一輪分分鐘係乜聲氣都冇。
至於我自己，現時份工其實係喺 Seek 網站搵。因為對我個人嚟講，我自己主動出擊主攻水面上既三成會容易過搵水底下既七成。不過呢方面真係人人都唔同，最緊要係清楚點做先係自己最有把握。搵工係可以有唔同既方法，最緊要係搵啱自己方法，把握機會。
