第一樣要講既相信係香港人最關心既住屋問題。如果有睇上一篇「喺羊國打工可以搵幾多」裡面既引用資料有提及 housing cost 同 household income 既比例。報告裡面近十年羊國人既住屋支出只係佔全年收入大概 16-17%。睇落去好似好低，但再留意下報告內既文字，佢有提到原來租屋既人一搬住屋開支係會上升到超過 40%。即係話所謂 16% 比例應該係講緊已擁有物業人仕。而根據返我觀察到既情況，喺 Auckland 中區租屋，一般三房 Unit 每週租金大概係 NZD500 左右，貴啲平啲都係取決於地理位置，是否校區等等。
住屋另一樣開支就係水電同網絡。電費喺羊國亦都係算貴。以我自己為例，由於老婆未返工長期喺屋企，每月電費開支就大概 NZD110 多啲。不過而家係冬天，用電會比夏天高，雖然我哋冇開 heatpump，但熱水爐都係用電，所以電費高啲係正常。
水費就一般般，暫時都係大概 NZD30 咁上下，不過呢個數暫時係講緊我獨居時候既數字，所以不能作準。
網絡費，呢吓甘咯。喺香港慣咗二百幾蚊家居寬頻無限上網，仲要係講緊 1Gbps。喺呢度，最低消費既 50Mbps 如果係 unlimited plan 的話係講緊大概 NZD80 一個月。你肯俾貴啲的話呢度都有 1Gbps 既，不過算啦，要慳啲洗，況然 50Mbps 睇 Netflix 4K content 都已經足夠有凸。
手提電話，每用 NZD30，4GB 數據，無限通話。
出街渣車要入油，現時油價，每公升 220-230 cents。
食方面，自己煮，去超巿買餸的話兩大人一小朋友，一日三餐大概要 NZD35 。出街食飯就比香港平得多。一般正常消費水平既西餐廳一個主菜一般唔過 NZD30。兩大一小既格局叫兩個 main 頂盡加多個頭盤大概NZD60-80 都食得好飽。如果係一大班朋友食到飽，人均消費都會係 NZD20-30。換算港紙的話，喺香港食一餐大概一千蚊 quality 既飯，呢度三四百蚊港紙就有喇。
其實住喺羊國，除咗衣食住行呢般基本消費，就冇乜其他錢要洗。同住喺香港既消費模式都好唔同。住喺香港，放假冇嘢做就係行街 shopping 娛樂，做乜都係錢。喺羊國，住咗唔係好耐就已經習慣咗喺度減低消費既生活。況且，羊國最大資源就係自然環境，放假行下公園，去吓郊外，要洗錢既可能係用五蚊買杯咖啡坐喺 cafe 搵人 R 水吹或者對住個海呆一個下晝。之但係咁既生活係咪適合你呢？
