第一樣大家要知既事，係大家當初拎住 JSV 入嚟既時候係冇任何福利可言。呢段期間如果你有乜頭暈身㷫就要閣下自理。所以當搵到工入紙申請及成功批出 Resident Visa 後，第一件事就係去附近診所做 enrollment。喺羊國每一個居民都會有一個連繫既家庭醫生，亦即係 GP。而每一個醫生，佢可以收既病人數目係受到法例限制，所以我哋就要做 enrollment ，mark 定自己認為好既醫生。做咗 enrollment 後每次去睇呢位醫生，政府都係有補助。至於實際最後收錢會係幾多，就視不同醫生而定，一般都係講緊 NZD40-50。
至於 GP 以外，例如需要住院等，呢度都有分係政府定私人。如果係政府的話係完全唔駛錢架。去到呢度，就引發咗我諗一個問題。如果呢度既醫療住院係唔駛錢，咁點解仲有醫療保險呢樣嘢呢？既然有免費政府醫院，點解仲要買保險搵私人？就呢個問題我有問過唔同人，得出既答案都非常接近，政府同私人醫院，主要分別就只有輪候時間。雖然理論上都係同香港一樣視乎你既病情而決定要排幾耐，但絕對唔會好似香港咁心臟病都要等五到十年先有得醫。至於其他嘢，原來所謂政府定私家，都係同一間醫院，同一堆醫生，十二人大房同訓走廊呢啲事係唔會發生。
另一樣喺羊國比較出名既醫療福利就係 ACC，所謂 ACC 全寫係 Accident Compensation Corporation，其實係一個局嚟，但講 ACC 意思就係指呢度既意外保障。呢項保障係完全唔分你係乜人，即使你係遊客，只要喺羊國境內發生意外，ACC 就會擔保你既醫療，復康等費用，以至病假返唔到工既損失。但有條件就係你不能追究有關意外既責任。不過係咪真係咁堅，都係果句，我有幸未能享用。
既然喺羊國有周全既醫療保障，其他洗費又咁高，我都係時候考慮 cut 咗一直喺香港供緊既醫療住院保險。用唔著就無謂繼續洗錢供。
