羊國既中小學都一樣係有分公立（資助）同私校，作為羊國居民只要你拎住 resident class 既 visa 就可以入資助學校免費讀書。至於啱啱拎住 JSV 嚟到的話，正如之前成日講，乜都要食自己，免費教育都唔會有，而且要讀書的話亦都要申請 student visa。Temporary work visa 既 dependent children 如果冇申請 student visa，只可以喺度以本地學生身份讀兩個星期，或者以國際生既身份讀三個月。所謂國際生，當然係要俾 international student 既學費，條數都幾金既。至於 JSV 計唔計入 temporary work visa，呢方面如果你需要既可能要親自 email INZ 問清楚。
小朋友喺羊國讀書，大學之前都一樣係分小學中學。而呢度係叫 Year 幾既。小朋友五歲開始可以入讀 Primary Year 1，即係小一，一年升一級去到 Year 6 之後，即係 Year 7 就叫做 Intermediate。Intermediate 只讀兩年，Year 9 就正式叫中學 Secondary 直至 Year 13，即係 18 歲咁上下。喺羊國，有啲學校可能只提供 Primary，有啲就可能係 Primary 加 Intermediate，有啲就甚致係一條龍由 Primary 去到 Secondary。
之前講搵屋既文章都有提過校網。所謂校網就係講你住既地方 In zone 有邊間學校。羊國學校係有分 zone school 同 non-zone。對於 zone school 嚟講，如果你住既地方係 in zone 的話，學校係一定會收你。冇錯，住址決定一切，唔駛好似香港咁玩大抽獎呢啲咁唔人道既嘢。所以點解好既校網屋租會貴一截。至於 non-zone，就即係佢可以自行按排收嚟自唔同區域既學生。Non-zone 唔一定係 private school，佢地一樣可以係 state，即係受政府資助，唔會向 local student 收取學費。呢方面就要搞清楚唔好混淆。
暫時講到呢度，下篇再講多少少關於搵學校既事。
