再談羊國學校分類

上回有講過呢度既中小學係有分 zone 同 unzone，今回想再講啲有關搵學校呢方面既技術問題。至於話揀邊間學校呢啲我覺得就取決於每人唔同，冇絕對答案。即使有啲學校普遍被認為係比較好，都要睇吓自己小朋友係咪適合。嚟到呢度，睇教育就不妨輕鬆少少，無謂將香港呢方面既劣質文化帶過嚟。

上回有提及搵學校有分成 Zone 同 Unzone。Zone 簡單地講通常（唔敢百分百肯定）都係 Public school，每間 public school 都會覆蓋一個 zone，好似上圖咁。只要你住喺呢間學校所覆蓋既 zone 度咁呢間學校就要無條件咁收你。如果呢間學校普遍地被認為係好學校，咁呢區既地價同租金就會相應地貴，係好合理既。而一個地址有可能同時被一間或兩間甚致三間學校覆蓋，咁可想而知呢塊地係幾值錢。搵屋既時候有時會見到咩 DGZ，通常都特別貴，意思就係 Double Grammar Zone，即係個地址係屬於兩間 Grammar School Zone 之內。

咁如果你唔係住喺呢啲天龍國地區，但又想入果間學校又係咪冇辦法呢？咁寫就當然唔係，呢種情況就稱之為 Unzone，即係你唔係住果區都可以報讀，當然，機會就會細好多，同埋學校係有權選擇收唔收你，同埋仲要睇學校收晒 in zone 既學生後仲有幾多位剩。

除咗分 zone，學校仲有分 public, integrated 同 private，大家可以睇成公立，資助同私校。對 resident 嚟講，public 同 integrated 都係唔需要交學費，但唔代表一毫子都唔駛出，因為呢度讀書仲有文具費，活動費等雜費，同埋學校既 donation。呢啲費用每間學校都唔同，雜費可能係講緊一百幾十，donation 名義上係可俾可唔俾，大概幾百蚊一年，但可以扣稅。

學校需要幾多既 donation，其實好睇間學校得到政府幾多既資助，政府既資助又要睇當區既人口份佈情況。不過係雞先定蛋先，即係因為啲人有錢而政府資助少啲定係因為政府資助少而要大家課金課多啲，呢個我就唔清楚。但間學校係咪多人錢人讀，呢個係有得睇既，留返下回再分解。