揀學校仲有乜數據睇?

上回講過唔同既學校，如果你住喺果間學校既 school zone 而果間又係 public school 的話就最簡單。對於新羊國人嚟講，好大可能落地到而家都係租緊屋住，而想買第一間屋時其中一大考慮就係搬去邊個 school zone。咁當你有得揀既時候，究竟有乜指標可以知道邊間學校比較被普遍認為係「好學校」呢？

正如上回都有講，好學校呢個概念係好主觀，所以正確嚟講其實係冇咩指標，不過客觀上都有啲數據大家可以參考吓。

首先當你開始做呢方面既研究時，第一樣應該會留意到呢度啲學校會有一個叫 Deciles 既所謂分數，最低係 1，最高係 10。其實呢個並唔係學校既分數，佢只係反映呢間學校既學生所嚟自既社區既經濟富裕程度，簡單啲講就係啲學生有冇錢，1分就最窮，10 分就最富貴。政府會根據呢個 decile rating 嚟決定撥幾多資助去營運呢間學校。錢就一定要洗，但政府撥少咗錢，學校就自然要靠家長既 donation 喇。咁去 decile 低既學校又係咪一定有著數呢？咁又唔係喎，搵學校亦都係一個自由巿場，普遍被認為好學校就自然多啲人去爭，多啲人搬去果區住，地價自然上升，導致 decile rating 都會上升。但要記住校區只係地價既其中一項因素，所以 decile 高係咪代表間學校一定好，其實又唔係必然。

如果講學術方面既，有另一個數據可以參考，就係 NCEA result，你當係香港既中學會考或 DSE 啦。而另一項同學術有關既數據就係間學校既學生有幾多個拎到 scholarship。當然，呢堆數據只係講緊讀書叻唔叻，成績好唔好。喺羊國，讀書升學唔係唯一既出路，唔似喺香港咁所有人只有考試升大學打份好工咁單一。如果乜都唔講只係講錢，喺呢度整水電一定好搵過大部份既大學畢業生。

至於小學，冇 NCEA result 咁有乜睇？唔好意思，呢度啲小學返學校係玩既，係透過遊戲學習生活，你估仲係香港咁白痴幼稚園就要背生字？ 所以呢度啲小學雞，問十隻十隻都會同你講好想返學。

雖然用咗兩篇嚟講關於搵學校既嘢，但都要再講一次，既然離開得香港，就唔好將香港果套劣質文化帶過嚟。學業唔係一個人既所有。好好享受羊國既生活啦。