2019年7月15日 星期一

抵步後的住宿安排


初到另一個地方生活,第一件事莫過於要安排住宿。除非你有唔知咩原因一早已經喺羊國有物業,否則你都要搵個地方租嚟住。喺羊國,有好多事都係要親身嚟到先可以開始搞,租屋就係其中一樣,個人唔喺度你係極難可以事前喺香港遙距搞掂。所以喺你搵到一個可以租嚟住一段較長時間既地方之前,你先要搵一個可以短暫住宿既地方。

以前移民既人初嚟報到可能要安排住一個月既酒店,條數都相當之金。好在而家有 Airbnb,價錢相對地便宜,有啲房源仲有廚房可以煮食,唔駛餐餐出街食又可以慳返多少。另外如果租住既地方係有房東同住的話,會有助你了解當地生活,遇到問題亦有一個 local 人照應吓。
至於要租幾耐既 Airbnb,咁就要睇你對你之後要長租既地方要求有幾多。一般嚟講,用一個月時間嚟搵屋就差唔多。

原則上喺羊國租屋唔算太困難,大部份人都係經 TradeMe 呢個 local 既類似拍賣網站嚟租屋買屋。上去按地區,幾多間房等要求搵啱心水既租盤,之後可以直接聯絡業主或者代理去睇屋。而呢度租屋,好興一樣叫 open home 既活動,即係指定某日某時間屋會開放俾有意租既人嚟參觀,同場會派 form 俾你填,你想租的話就填妥申請表,交返俾業主,業主就可以慢慢揀佢既心水租客。呢度住屋同香港一樣,不論買定租價錢都好受當區校網影響。好校網既租盤競爭大,業主絕對唔憂租唔出。

業主揀租客最主要會睇幾樣嘢,一就係你既職業,二就係你既 reference。某啲業主亦會 concern 你有冇寵物,係貓定狗。初到羊國,頭一二樣你都唔會有,再加埋第三樣的話你租屋既難度會大增。而我就係中晒呢三樣,不過難,唔代表唔得。

啱啱嚟到羊國乜都冇,填租屋申請表時職業同 reference 都留空,好多時都會俾業主第一批篩走。呢樣嘢其實真係好難搞,不過唔係冇得搞。首先,喺羊國做人一定要誠實,呢度既人對人既誠信係非常重視,俾人知你吹水的話已經乜都唔駛再傾落去。其實填 form 之餘,租屋 open home 既時候好多時屋主都喺度,你可以同佢打個招呼,打開話題,令屋主先對你有個良好印象,亦都希望佢收晒 form 之後會認得你,但當然唔好做煩膠令人厭惡。你可以同屋主講下你既行業,如果係一啲唔難搵工既熱門行業,你都可以字裡行間講你都好快搵到工之類。甚致乎你可以向業主證明你有 cash,起碼夠交半年至一年租。講嚟講去,關於職業既嘢,業主都係驚你冇錢交租啫。

至於另一難題 reference,呢度租樓唔係有錢就得,大部份既業主都會要求你提供一個兩個甚致係三個 reference,reference 之中最好就係有你既前屋主,用嚟證明你係一個好租客。啱啱嚟到租你既第一間屋,你都好難搵到 reference,如果你啱啱到步係住 Airbnb 的話,咁就可以叫 Airbnb host 做你 reference。其餘既 reference,可能要試吓搵你朋友幫手證明你既人格,或者曾經同你同住過既人,證明你既生活唔喱啡。

啱啱嚟到搵地方住,老老實實就唔好 set 到個要求太高,乎合到基本要求就可以。不過要注意呢度租屋好多時屋主都會要求最少租一年,所以亦都唔好話求其到環境好差租金又貴都走去租,因為要捱足一年架。完咗呢個死約後,到時你都搵到工,又有屋主 reference,要搵第二間屋租就相對地容易好多喇。

移居羊國,你預備好未?

近期香港局勢動盪,好似觸發咗一輸恐慌性移民潮,大量仍身處香港朋友都有問我關於移民羊國既事。呢個 blog 一直以來講關於移民羊國既嘢,主要都係圍繞住技術討論,但其實講移民,最重要既係 mental 上既問題,即係你同你既家人 ready 未?