2019年7月17日 星期三

羊國買車經驗分享


車可以算係羊國既半必需品。初嚟羊國時,我本身唔急於買車,因為暫住既地方附近都有巴士站,出巿區都唔係問題。開頭搞銀行,換車牌等雜事都係搭巴士出去搞掂。但去到要搵長租既屋既時候,發覺冇車都幾大鑊。之前講過租屋時好多業主都會喺特定時間 open home,open home 大概有半小時。搭巴士,好難預啱班次時間,加上大部份地方都唔係話門口就係巴士站,好多時落車都要再行十五分鐘咁上下,甚致係更遠。本身自己搵屋既難度比人高,如果再加多重困難對自己實在太不利,所以我就將買車呢件事變成優先處理。


喺羊國買車,最多人搵既又係 TradeMe 呢個網站。所以嚟到羊國有個羊國電話號碼既時候第一件事應該係 register TradeMe account。同香港既 28car 一樣,上面有私人放盤亦有車行登廣告,唔同既係呢度啲車行就唔會扮私人,感覺上冇咁鬼,同埋呢度車行係要攞牌,所有 registered dealer 都有 number 既。除咗上 TradeMe 我亦有聽過一啲叫 car fair 既活動,即係車主將有意放售既車渣去會場,自行推銷放售。因為車主參加 car fair 要登記費,揸得嚟既都係有心賣,所以聞說價錢會比較相宜,間唔中會執到好嘢,不過就可遇不可求。

我自己架車呢,就係喺 TradeMe 見到有車行放出嚟,去到發現原來佢又唔算我哋香港見慣果啲車行,佢似係以前啓德果D爛地二手車場,係啲車主放架車喺度寄賣,登記車主都仲係上一手車主而唔係呢間車行。喺度買車係好 causal 既一件事,我去到車場,搵返我喺 TradeMe 睇到果架,同車場個人講,咁佢就俾條車匙我自己一個渣出去試車,佢完全唔驚我揸走架車一去冇回頭。試完車返嚟滿意,俾錢就成為新車主,可以揸走架車喇。

俾錢方面有一點要注意,我哋初嚟羊國正常都冇 credit card,有既都係一張銀行咭。銀行咭用 EFTPOS 買嘢每日最高上限只得一萬蚊羊幣,買架車新少少都搞唔掂。如果你睇中架車係一萬蚊以上,咁你要早啲預備定現金,或者預鬆啲時間去銀行櫃位過數。

另外,如果好似我咁喺 dealer 度買車,俾完錢就可以揸走,因為 registered dealer 係可以網上幫你搞過戶。如果係私人買賣既,就要買家同賣家都要填 form 再去郵局俾錢登記過戶,買家同賣家係唔需要一齊去搞過戶既,但你要確保雙方都搞清楚晒啲手續。呢方面我就冇經驗喇。

篇幅有限,下篇文章先再講有關車價同揸車既開支。

移居羊國,你預備好未?

近期香港局勢動盪,好似觸發咗一輸恐慌性移民潮,大量仍身處香港朋友都有問我關於移民羊國既事。呢個 blog 一直以來講關於移民羊國既嘢,主要都係圍繞住技術討論,但其實講移民,最重要既係 mental 上既問題,即係你同你既家人 ready 未?