上回講過唔同既買車途徑，無論經邊度買都好，車價一定係其中一個重要考慮因素。全世界都一樣二手車都係取決於車款，年份，新淨程度，已行駛里數等。車款嚟講最平既係泡菜國同袋鼠國既車，日本車嚟講喺香港一街都係既「雙田」喺呢度反而唔算好大路。要平既，好多人都會揀 Kia, Suzuki 或者 Holden，呢三隻牌子都好常見。歐洲車就比較貴，但差距就唔會話好大。
另外唔好以為呢度啲人經常私家車出入啲二手車既里數一定好高。有好多三四年車齡既二手車里數都仲可能 keep 喺二萬公里樓下。因為 Auckland City 唔算好大，住 Auckland City 既人普遍揸車去買吓嘢可能只係講緊十五分鐘車程咁上下，甚致平日返工為咗避塞車而搭巴士或鐵路，所以經常會見到好低里數既二手車。
講返車價，要平既，買架十年左右普通泡菜車可能只係幾千蚊羊幣，中價少少，五年內既日本車咁二萬蚊羊幣內都會搵到。話平其實唔算真係好平，但勝在豐儉由人大把選擇。另外如果上 TradeMe 睇車好多時見到有啲車比正常平，細心睇佢 description 佢會寫住 statutory write-offs in Australia，究竟係乜意思呢？其實呢度都有唔少二手車係由袋鼠國入口，而有 statutory write-offs 既話幾乎可以肯定呢架車係袋鼠國撞過，之後運過嚟羊國呢度修理再重新 certify 可以喺路面行走。我個人嚟講就一定唔會揀撞過既車，就算話 certify 過安全都係咁話。
買車另一樣要睇既就係架車個 rego fee 同 WOF 幾時到期。一架車可以合法地喺路面行就一定要有有效既 rego 同 WOF。Rego 其實即係牌費，續一年牌就大概一百蚊羊幣多啲，唔理你幾多 cc 都係收呢個價，所以呢邊揸大 cc 車係好抵玩。唔續一年可以選擇續三個月或六個月，但除返開平均每個月會貴少少。續咗牌佢會寄張 rego lable 俾你痴喺擋風玻璃。WOF 全名係 Warrant Of Fitness，即係一張證明你架車可以安全地喺路面行，簡單啲講即係要驗車。呢度啲車大部份都係每年一驗，驗完合格就會有一張 WOF 貼喺你個擋風玻璃，上面有你張 WOF 既到期日。新車嚟講，WOF 一簽係簽三年。如果係 2000年1月1日前登記既車 WOF 就每次只簽半年。其餘正常情況都係簽一年。擋風玻璃上兩張貼紙都要同時喺有效期內先至合法，是旦一樣過期俾人捉到的話都要罰錢既。
另外去 car dealer 度買二手車可能會有啲係未喺羊國登記既，呢啲車 dealer 通常都要你額外加多大概三百蚊叫 ORC 既登記費，呢啲額外收費就要留意吓。
至於喺羊國生活一般代步適合買咩車呢個問題，以 Auckland City 為例，個人覺得唔需要買太大既車，一般 sedan 或 hatchback 都夠做，SUV 我就覺得略大，泊街唔方便，況且住 city 應該都唔會點 off road。另外我會推薦買 2000cc 級既車，因為 Auckland 多斜路，1500cc 恐防坐滿人時就比較吃力。而 2500cc 就可能有啲 over power，因為你架車幾勁都好，都係贏唔過塞車呢回事...
