上回港人出走羊國攻略（二）就講咗有關 EOI 既嘢，今回就繼續講埋之後既流程。
基本上如果有自己做功課，填完同 submit 埋 EOI 後，相信對成個 SMC 申請流程已經有一定既理解。咁實際上 submit 完 EOI 之後會點呢？如無意外，當你提交咗 EOI ，而你喺 EOI 裡面又聲稱自己有 160 分以上的話，你份申請就會自動入咗紐西蘭政府 Immigration New Zealand (INZ) 個 pool 入面。而每個月，INZ 都會喺呢個 pool 入面抽獎。抽中就代表你距離成功又近一步，抽唔中都唔好灰心，因為你份申請仍然會留喺個 pool 度等下次再抽。基本上以我聽返嚟既 case ，全部都係兩至三個月內抽中。關於抽獎呢回事，INZ 網站內都有每個月既申請數目，中獎數目同抽獎日期等既數據公開，大家可以自行參考一下。
提交咗 EOI 之後，就要開始留意自己 email，因為 INZ 會透過 EOI 上所填既 email 嚟通知各位得獎者。另外記得留意個 email 會唔會唔小心落咗去 junk mail 度。當收到得獎通知後，第一件事就係 backup email 裡面所有資料同表格去你另一個 email service provider 度。我當年好彩有做呢樣嘢，因為就係咁啱得咁橋唔知中 bug 定咩，成個 email 唔見咗。如果真係唔見咗又冇 backup 既話，唯一辦法就係要打電話去 INZ 睇吓可以點做。
收到呢個得獎通知後，我哋就正式去到 ITA 呢個步驟，即係 Invitation To Apply，意思即係 INZ 基於你 EOI 上提供既資料而正式邀請你去申請居民簽証。冇錯，其實嚟到呢一步先至係真真正正既申請，亦即係開始埋牙，最多嘢搞既亦都係呢一步。之前提過既學歷評估，職業評估，身體檢查，無犯罪紀錄等等都要喺呢個階段交出真憑實證。
喺呢度，其實有啲嘢係可以喺收到 ITA 前就預備定，例如職業評估呢一項。香港一般公司喺你離職後所提供俾你既職業證明，好多時都係非常簡單，上面只有你既簡單資料，在職日期同職位等，呢堆嘢係唔足夠去滿足 INZ 既審批要求。除咗呢啲基本資料之外，INZ 係要求你既職業證明列出你既每週工作時數（證明你係全職工作），工作性質，即係 JD - Job Description，同埋你因乜 qualification 而得到相關職位。其中 JD 係最為重要，佢一定要 imply 到你係做緊你填 EOI 時所申報既職業。記住而家唔係寫求職信，你唔駛寫到自己係萬能乜都識，最緊要係重點寫出同你所申報既職業有關既嘢，寫太多佢有可能認為你既工作唔夠專業而對你申報既職業既相關程度打個折扣，絕對係冇好處。喺你填 EOI 即時候，你一定有參考過 ANZSCO 裡面唔同工種既 job description 嚟決定你要申報既職業，但記住切忌搬字過紙將 ANZSCO 上面既 JD 當成你個人既 JD。審批你既申請係有血有肉既人嚟，抄功課的話一眼就睇得出，絕對會令人懷疑你既申報係咪基於事實。
上面所講既工作證明，雖然係講到自己寫咁，但名義上佢係要求你一定要公司信，因為而家係你公司證明你做過乜，唔係你自己話你自己做過乜。封信一定要係公司信紙，有公司代表既簽章。當然，如果公司允許既，自己 draft 一分再由公司 approve 幫你簽名就最好既。不過，喺香港既打工文化，相信大部份人喺成事前都唔想俾你公司知你搞緊移民，咁除咗公司信仲有咩辦法呢？我有聽過有人用 employment contract 都一樣成功，之但係最重要都係，你提交既證明係要俾人睇到你係做緊同你所申報職業相關既工作，咁就視乎你份 employment contract 有冇例出你既 JD 喇。
另一樣要注意既係，你只需要提交你所申報工作年資相關既工作證明。即係你最盡其實都係報你十年工作經驗，所以最多你都只需要提交你十年相關工作經驗就夠喇。如果十年內，你一年半載就轉一次工既，咁要搜集返呢堆工作證明其實都極花時間。所以，喺你收到 ITA 前，你就應該要著手預備呢堆文件，咁當收到 ITA 後，就可以集中精力處理其他部份，確保你喺限期前可以交回 ITA 既所有文件。
今回篇幅所限，下回繼續講 ITA 其他要注意既事。
