上回港人出走羊國攻略（一）約略講過技術移民羊國既基本要求。今回就簡單講吓申請流程攻略。
如果大家已經開始著手睇資料，上網搵料，一定會見到好多 terms 好似咩 EOI，ITA，IQA 一堆堆唔知係乜既英文字母，可能頭都大埋。都係果句，其實唔難，呢啲都只係申請流程既其中一部份。成個申請流程，可以簡單分為下列步驟：
- EOI
- ITA
- 審批
- NSC
- Visa granted
填 EOI 時，基本上係唔需要遞交任何證明文件，成個過程都係網上搞掂。但當你要填你既英語水平時，佢係要求你填你英語考試既 Test Report Number，即係話你要考咗試，收到成績，先可以填到呢部份。而以報考 IELTS 為例，報考係要考試前兩星期報，考完後亦要兩星期先出到 result。即係話，喺你預備填 EOI 前一個月，你就要預備報考 IELTS 喇。不過近期有收過消息 IELTS 將提供用電腦考試呢個選項，可以好快就出到成績，呢方面我就冇研究喇。
另一樣會阻住你交表既就係學歷評估。呢樣可以分開三部份嚟睇。如果你只需要申報 undergrad 畢業，而你張畢業證書係乎合羊國例出可豁免評估既大學，學位同埋畢業年份，咁你喺交 EOI 時就唔需要做學歷評估。而好不幸地，自 2017 年後畢業的話，香港既大學已經冇任何豁免，原因？你懂的。如果你要申報 postgrad 或者你間大學或學位或畢業年份不獲豁免，你就要去搵一間叫 NZQA 既機構做學歷評估。學歷評估亦都分兩種，第一種叫 PAR，係一種 pre-assessment，唔需要你遞交任何證明，只需要網上填表再俾錢就有一個 pre-assessment result 話你屬於 NZ Qualification Framework 下既邊個 Level。一般 undergrad 係屬於 level 7，而 postgrad 就係 level 9，20分既差距就喺呢度。第二種評估就叫 IQA，係正式既評估，需要你網上 send 你各張證書同 transcript 既 certified copies 俾佢哋睇。填 EOI 時，佢只需要你有 PAR 既 result 就得，但往後既流程，你始終都係要做返一次 IQA 既。
既然係咪都要做IQA，咁 PAR 有乜意義呢？正如頭先講，PAR係 pre-assessment，係唔需要交任何證明而又可以拎到一個 assessment report number 嚟填 EOI，對某啲人嚟講要搵返晒D 大學畢業證書仲要做埋 certified true copy 可能唔係一時三刻可以完成既事。各人都可能有唔同既原因需要好趕咁入 EOI，例如年齡問題啦，又或者擔心羊國移民政策突然改變等等。再加上 PAR 價錢係比較平，如果你唔肯定自己拎住既學位乎唔乎合你預期既 qualification level，都可以考慮用 PAR 試一試佢。呢方面既決定其實就比較個人，冇絕對既答案。
而如果你係選擇做 IQA 的話，你係可以再加錢買一個叫 fast track 既服務。用咗 fast track 佢會承諾喺一個時間內俾到 result 你，過鐘的話佢係會退錢既。我當年都有用 fast track，交齊文件兩個星期就收到 result 喇。
任何國家既移民政策都不斷收緊，而政策轉變好多時都係話改就改，甚致即時生效。個人宗旨係，有決心出走既，可以洗錢嚟解決問題就用洗錢既方法解決。對一個大 project 嚟講，無謂慳果一千幾百而夜長夢多。
剩低既流程攻略，請看下回分解。
