本專頁第一篇文章，第一件最重要既事就係戴返個頭盔先。本文章內容純粹作者個人意見，並不構成任何移民建議，作者亦非任何形式之移民顧問。
近幾年香港民間話題，除咗買樓，相信就係移民。以前既我，可能同好多人既諗法一樣，作為香港既一個普通打工仔，移民好似係一件遙不可及既事。平時搵份比上不足比下有餘既人工，供樓或租樓都佔咗開支一大部份，仲邊有閒錢搞呢啲嘢。但隨住身邊既朋友走吓一個走吓又一個，我就開似認真研究吓呢個課題。花咗一輪時間，睇吓唔同熱門移民國家既資料。其中發現，原來
移民羊國，其實唔難。
羊國技術移民要求
近年好多國家，例如楓業國，袋鼠國都暗啞底將移民門檻提高。雖然羊國既移民政策都係改完又改，但到目前為止，羊國既移民要求仍然相對貼地。當然，本身作為一個普通香港打工仔，並非油王，講既都係靠技術移民。而喺羊國，申請技術移民，係要申請Skilled Migrant Category Resident Visa (SMC)。冇錯，同好多其他國家一樣，所謂移民，其實係講緊申請一個居民簽証。至於入藉，Citizenship 呢啲嘢係後話。
羊國既技術移民，係採用計分制。我係 2018 年年頭申請，當時既要求係要有 160 分以上先接受申請。接受申請唔係代表你一定成功，因為申請只係第一步。成個計分系統，主要係睇幾樣範疇。首先第一件事，如果你年齡係 55 歲以上，咁你可以出返去先。第二，話明係技術移民，人哋國家係睇中你既技術先至肯放你入嚟，所以你要肯定你有佢哋要求既技術，簡單講就係你既職業。至於人哋需要咩職業，就麻煩各位看倌自行去羊國移民局網頁搵喇。我成日都講，如果連自行 google 呢Ｄ咁公開既訊息都懶或者覺得有困難，係好難喺一個新環境重新適應同生活，就當係迎接新挑戰前既小考驗啦。年齡及職業以外，就係你既學歷，英語水平，身體狀況，犯罪紀錄等等，其實都係啲大路嘢。
上面提到既幾項影響你分數既因素，其中以年齡，職業同學歷至為關鍵。分為唔同既年齡層，職業年資，同學歷都會影響你既分數。例如如果你人到40先嚟申請，就會比你39歲時申請少10分！年齡絕對係一項冇得抆既因素。職業年資就越長年資越高分，10 年就爆錶拎到50分。而當中如果有6年以上工作經驗係屬於羊國既 absolute skill shortage area，就會有多15分，2-5年就有10分。至於學歷，Postgrad 同 Undergrad 係有20分既差距。總括而言，要進入現時技術移民羊國既門檻，你係要39歲或之前申請，10 年工作經驗，當中2年以上係屬於 absolute skill shortage，並且係 postgrad 畢業，咁就應該夠做。
咁如果乎合唔到以上所有條件，係咪可以收工呢？咁又未必既，因為仲有一項係關乎你 partner，即係伴侶（唔一定要有婚姻關係）。如果你自己本身係 undergrad 畢業，但你 partner 係 postgrad 的話，呢度都有20分執架。詳情最好就係自行去羊國移民局網頁睇吓，佢哋已經有一個計分程式幫你計分，只係答幾條問題 click 幾吓就知自己夠唔夠分。俾埋個 keyword 你： INZ SMC EOI
如果你想移民羊國，又計過你係夠分，首先就恭喜你先。下一步要點做，就留待下回分解。
如果你想移民羊國，又計過你係夠分，首先就恭喜你先。下一步要點做，就留待下回分解。
