學歷評估係另一項直接影響你 EOI 所 claim 既分數成唔成立既項目。不過相對喺職業評估，做法就簡單得多，甚致可以話係填表交錢就搞掂既事。正如之前文章有提及，學歷評估係由一個叫 NZQA 既部門負責，而當中又包括 PAR 同 IQA 兩種 assessment。但嚟到 ITA 呢一步，要做就一定要做 IQA。
IQA 係正式既 assessment，所以唔再係 PAR 咁齊噏，你所申報既所有學歷都需要提交證明文件。當然，填 EOI 時你都會察覺喺香港大部份大學既 Undergrad 都有 exemption 唔需要做學歷評估而獲直接承認，但同時我亦有聽過有 case 係 INZ 最後都要求返某啲申請者補做返個 IQA。背後準則如何我就唔清楚。而我自己因為我既 Postgrad 唔喺 exemption list 度所以我係需要為我既 Postgrad 做 IQA，繼而順手報埋我個 Undergrad 學位。所以我既 IQA result 係有齊我 Undergrad 同 Postgrad 既認證。
做 IQA 另一個棘手既地方可能就係關於 certified true copies。好奇怪，雖然所有文件都係經NZQA 網上系統去 upload。但佢係要你 scan 好份 certified true copy 再 upload 上去。唔好考慮 scan certified true copy 既意義。佢叫你咁做你會唔會唔做？
至於 certified true copy 係咩呢？其實即係影印本，但份影印本係需要有合資格人仕核實。每個國家所要求既合資格人任都會有些少出入。羊國既要求，佢除咗例出幾類喺羊國合資格既人外，佢最後仲有一句係講申請人所在地既合資格人仕。即係如果你喺香港，你就可以跟返香港法律乎合做 certified true copy 既人幫你做。好多人都話可以去民政處度免費搞，但我當年睇過民政處網頁，民政處已表明佢哋只做宣誓，唔會再做 certified true copy，所以呢條路應該已經封咗。咁係咪咁大鑊要搵律師搞呀？我有聽過搵律師搞係逐份計錢，成千蚊份，條數為起上嚟都幾甘。咁仲可以點做呢？答案就係 JP - Justice of Peace，即係太平紳士。大家唔好唔記得香港係仲有太平紳士，就算你唔知佢哋平時係做乜都好，你只需要知道呢一刻佢可以幫到你就得。咁太平紳士喺邊度搵呢？只要大家留意下，其實好多區議員或者立法會議員都有太平紳士銜頭。最好既辦法，就係搵返自己選區既議員，佢哋會特別落力。就算唔同區都好，普遍嚟講佢哋都樂意幫你既。
講返份 certified copy 本身，大家記住上面一定要有以下字眼：
I have sighted the original document and certify this to be a true copy of the original.跟住就係幫你 certify 既呢個人既名，聯絡資料（例如電話號碼），日期，同埋最重要就係佢既銜頭同蓋章。
搞掂好晒啲文件，上返 NZQA 網頁填表 upload 文件再俾錢，咁就搞掂。跟住落嚟就係等。做 IQA 俾錢果時佢有選項係加錢特快處理。由於 ITA 係由佢寄俾你後四個月內要交齊所有文件，我有聽過有 case 個 IQA result 出唔切，事主需要提供證明俾 INZ 自己已經一早申請但 NZQA 進度緩慢。雖然 INZ 最後都接納佢既申請，但為免折外生枝，我都建議加錢做特快處理。都係果句，可以洗錢解決既問題就洗錢解決。
下回繼續講吓剩低落嚟 ITA 既申請文件。
