首先第一樣收到 ITA 後可以即刻去做既就係無犯罪紀錄證明書 (CNCC)，即係大家俗稱既良民証，INZ 稱之為 Police Certificate。點解收到 ITA 要即做？因為容易做，但同時又容易出事。首先要知道一件事，申請無犯罪紀錄通知書係要事先預約，去警察總部度搞既，過程只係十五分鐘咁上下，主要都係填簡單資料再俾錢就搞掂。之後，係冇之後架喇，因為份證明書係唔會經你手，你係冇任何機會見到份嘢，警署係會直接將你份嘢寄去紐西蘭領事館。
看似簡單，咁點解會話容易出事呢？首先，原來要申請呢份無犯罪紀錄證明書唔係你話申請就申請，你係要有一封由羊國政府發出俾香港警察要求佢地寄出無犯罪紀錄證明既信。開頭我唔知係要封額外既信，只係帶咗我份 ITA 申請表，雖然上面有註明需要呢份無犯罪紀錄證明書，但香港警察唔受理拒絕幫我搞。後尾我先知原來係要喺羊國駐香港既 Visa Center 搵佢哋幫手出一封信去俾警察，帶位呢封信上去警察先會幫你搞既。
另一個神奇位就係，呢份無犯罪紀綠證明書一來唔經你手，二來佢哋亦唔係直接寄去羊國 INZ，而係按羊國要求寄去位於紐西蘭駐北京領事館。成件事最奇怪既係對於成個 SMC 申請過程嚟講你係從未同紐西蘭駐北京領事館接觸過，北京果邊應該係冇你既資料。當時我都有個疑問，警察寄咗份嘢過去北京，北京收咗你份嘢後又點會無啦啦識得轉發去 INZ 呢？呢個謎團直至我成個 SMC 申請過程既好後期終於解開，因為負責我 case 既 Case Officer (CO) 同我講收唔到我既無犯罪紀錄證明書，果然真係出咗事！結果，我要同 CO 商討可唔可以叫警察將份證明書直接寄俾佢，唔經駐北京領事館。CO 確認可以後，我又同香港警察呢邊講可唔可以再寄出並直接寄去羊國。搞咗一輸，最終我要安排 courier 上警察總部收件將文件直接寄去羊國 CO 手上。額外既費用當然係自付啦。呢個問題究竟點預防呢？我就諗唔到喇，唯一可以做既就係記緊 keep 住你申請證明書時既收據同上面既 number，萬一到最後真係中咗招，你都可以同你既 CO 講你有如期申請，責任不在我方，CO 一般都會接納既。
如果你喺香港以外地方都有居住過十二個月或以上，你都要提供埋當地既 Police Certificate，點搞呢我就冇經驗喇。
