健康證明亦係一項非常簡單既嘢，同樣都係花大概半日時間現身俾錢就OK。不過要留意做健康檢查唔係話你去邊做都得，喺你既 ITA 資料入面佢已經有提供羊國政府喺香港認可做身體檢查既醫務所。去醫務所 book 期時佢會問你做邊隻身體檢查，佢係有幾種唔同既身體檢查，用幾個唔同既 code 代表，要做邊款就要睇返 INZ 既資料喇。
同 Police Certificate 一樣，份 report 理論上係唔會經你手而直接去咗羊國果邊既。不過如果你既檢查有啲小問題，數字唔靚等等，醫務所都會叫去翻驗部份項目，都係果句，洗錢啫。
ITA 最後想講既一樣嘢就係 Partnership 證明。當你既申請係有包括埋你既 partner 時你就要做呢一步。呢部份其實冇好硬性規定你要點做。你會喺 ITA 資料度搵到一張清單例出可以用嚟證明你哋 partnership 既證據，清單上面有十幾項，你唔需要交足咁多樣，只需要提交當中三樣就夠。不過記住，政策可以成日變，大家要自行留意返究竟你要交幾多樣。就咁結婚證書呢啲係唔夠做既，因為全世界都知香港鄰近地區好興一樣叫假結婚既嘢。所以你要額外提供清單上提及既證明喇，例如一齊買樓既按揭證明，租樓既可以提用聯名租約，聯名戶口證明，一齊生活既證據等等。
對某啲人嚟講，可能本身係油王間屋係冇按揭，租屋又冇聯名，又冇聯名銀行戶口等等，咁又唔係冇方法既。其實 INZ 目的都係想證明你地係真係一齊生活，你諗得出既證明又合理既其實都可以嘗試拎嚟用。當年我都提供唔到佢清單上可以用既證明，於是我就提供咗我地結婚證書，結婚相，一齊旅行既登機証，旅行合照，家庭照，一齊出席一大班朋友聚會既合照，一齊參加過既活動既門票，一齊供保險既紀錄，雖然冇聯名戶口，但我哋提交咗我地銀行戶口恒常既過數紀錄證明共同承擔家庭開支。必要時甚致可以搵朋友幫你寫信證明你哋既關係，不過呢招我冇用。另外，由於我放咗咁多清單以外既證明俾佢，怕佢唔識理解，所以我另外再寫左幾頁紙既信，附以列表說明點樣解讀我所提供既證明，堆證明就以 appendix 形式夾埋喺封信度。最後結果係非常順利，由始至終都冇質疑過我哋既 partnership status。
另外，其實 INZ 有提供 online enquiry，你可以就住自己情況嚟問吓可以提供啲咩。當然呢Ｄ general enquiry 一定會戴晒頭盔，唔好嘗試打爛砂盤問到篤迫人白紙黑字承諾你可以接受啲乜，因為決定得唔得既係你既 Case Officer，唔係呢啲 general enquiry 既 staff，而喺 ITA 呢一步暫時係未有 Case Officer 跟你個 case 架。
有關 ITA 上要注意既事就寫到呢度。記住 ITA 係要將所有文件 hard copy 寄去羊國，又係果句，唔好慳一百幾十，用有 tracking 既速遞就最穩陣。仲有，嚟到呢步就要俾申請費架喇，記得限期前過數，佢哋一定要收到錢先會開始做嘢！
