之前用咗幾篇文章去講關於 ITA 既事，因為 ITA 係成個 SMC 申請過程中最多嘢做既一步。回覆咗 ITA 後如果順利既話基本上可以話只係等佢審批。審批時期快既可以半年，慢既長至一年都有。ITA 既下一步，就係 Case Officer Assigned (CA)，即係 INZ 已經搵咗一個 Case Officer (CO) 去跟進你既申請，往後所有關於你呢個申請既事都係直接同呢位 Case Officer 聯絡。
嚟到呢一步，大家要做既就係留意住自己 email，因為 CO 如果喺你申請上遇到有乜問題佢都會透過 email 去搵你。呢度做嘢係唔會 multi-threading，如果佢有個問題 block 住咗，你又唔回覆佢既話，成個申請佢就會停咗喺度唔處理。一般嚟講唔會話咁順利真係交完 ITA 翹埋手跟住就收到 visa，CO 最少都會搵你一兩次，只係視乎問題既大少。其實 CO 搵你都有好處，就係你知道當刻你個 case 係有人跟緊，唔駛擔心份嘢石沉大海。
CO 做嘢係需要時間，大家切忌 email 去催促或經常查詢進度。人哋有人哋既做嘢方法。如果你個申請橫誇埋個聖誔呢啲長假期，咁你真係要慢慢等。
當 CO 做你個 case 做到七七八八時，佢就會要求你填一份叫 National Security Check (NSC) form 既嘢，其實都係簡單嘢，啲資料喺你 EOI 或者 ITA 時你都有填過。呢一步純粹係文件嘢，冇乜特別，但就係一個你個申請審批快將完成既指標。
當你既審批完成後，你既 CO 就會 email 聯絡你審批完成，你就會收到一個 e-Visa 既 email，恭喜你，你成功咗喇。嚟到呢度，對一般人嚟講其實仲有最難既一關喺後面，係咩呢就留返下回再講，起碼呢一刻係值得去慶祝咗先！
