2019年7月8日 星期一

申移羊國居民簽証最終考驗


上一系列文章講述如果填表申請透過 SMC 得到羊國居民簽証。經歷漫長大概一年既時間,你既 Visa 成功批出,但大部份人獲批既,並唔係居民簽証,而係工作簽証。打完大佬,唔代表即刻爆機,因為仲有個真正既 final boss。

大概幾年前開始,羊國政府已經修改咗移民政策,對於乎合居民簽證申請資格,即 EOI 有 160 分以上,但未有羊國 skill employment 或者非羊國大學 postgraduate 畢業既申請者,一律只會批出一個叫 Job Search Visa (JSV) 既簽証。呢個簽証絕非居民簽証,入境時你唔可以排居民條隊,唔會有任何居民既福利,但稅仍是要交的。

Job Search Visa 只係歸類為 work visa,而有效期係由批出後即時開始計一年。之前搞一大輪嘢等足一年,最後只得一個一年期既 work visa 係乜玩法?個玩法就係羊國政府為咗證明你係適合喺度生活,有能力食自己,唔似某國人可以一去到另一個地方就即刻拎福利拎公屋,佢要你喺一年內搵到一份你喺申請時申報既 skill employment。如果你喺呢一年內搵到份啱既工,咁你就可以再向 INZ 申報,將你個 JSV 轉成 Residence Visa,當刻你先真正成為羊國居民。不過仲有一個條件,就係你份工要維持到三個月或以上,呢個係你呢個 visa 既一個 condition。三個月後,如果你仲工作緊既,你可以再聯絡 INZ 將呢個 condition 搣甩,成件事就正式功德完滿,再下一步就係住夠兩年成為永久居民,五年後申請成為公民。

如果一年內搵唔到相關既 skill employment 咁點算呀?好簡單,visa expire,同時成個申請都會 expire,即係話正式 game over。不過目前我係未聽過有失敗例子,雖然呢度搵工唔易,但只有有決心同肯調節自己心態,總有方法。

咁如果係中間 case,搵到份工,但三個月內冇咗份工,咁點自算?呢個情況,INZ 會俾你個 JSV extend 多一年。呢啲 case 我自己就未聽過,除非你自己唔知點解做唔夠三個月要辭咗份工,因為羊國打工尤如鐵飯碗,炒人難過登天。

另外仲有其他 condition,例如只搵到 contract 而非 permanent job,只搵到 part time 等等,呢啲咁騎呢既 case 可以自行上 INZ 搵資料,佢地已有例明幾多年既 contract 足夠滿足要求,每週工作幾多小時視為 part time 咁。一年內要搵到工,其實係同時間競賽,如果不幸去到中後期都未有著落,contract 同 part time 都會係一條救命草,同時亦可幫你容易啲搵到一份長工。之後可以再講講呢度既搵工文化。

移居羊國,你預備好未?

近期香港局勢動盪,好似觸發咗一輸恐慌性移民潮,大量仍身處香港朋友都有問我關於移民羊國既事。呢個 blog 一直以來講關於移民羊國既嘢,主要都係圍繞住技術討論,但其實講移民,最重要既係 mental 上既問題,即係你同你既家人 ready 未?